Film ke shaandaar set ki baat ho ya behtareen camera work ki, release ke saath hi aath aqsaat par mushtamil is series ko shaiqeen ki janib se kaafi pazeerai mil rahi hai.

Is web series ki kahani taqseem Hindustan se pehle is ilaqe mein basne wali ek tawaif Malka Jaan aur un ke kothay ki zindagi ke gird ghoomti hai.

Dehaiyon pehle Heera Mandi raqs, musiqi aur tehzeeb ka markaz hua karti thi lekin waqt ke saath rafta rafta tabdeeliyan aati gayin aur is ilaqay se ‘badnami’ jur gayi.

Muarrikhin ke mutabiq is ilaqay ki tarikh 450 saal purani hai jis ki tafseelat kaafi dilchasp hai.

Heera Mandi Wujood Mein Kaise Aayi Thi?

Heera Mandi ko is ka mojooda naam taqreeban 250 saal pehle mila. Is ka naam Maharaja Ranjit Singh ke Diwan Heera Singh ke naam par rakha gaya tha.

Badshah Akbar ke daur mein Lahore shehar saltanat ka markazi shehar tha aur us waqt Heera Mandi ka ilaqa Shahi Mohalla kehlata tha.

Aaj bhi Lahore ke wo ilaqay jin mein Haideri Gali, Tibbi Gali, Heera Mandi aur Qila Road par waqai Novelty Chowk ‘Shahi Mohalla’ hi ke naam se ma’roof hain.

Maazi mein shahi khandan ki rehaishgah ke ird gird ka ilaqa jahan un ke nokar, mulazimeen aur doosar ahalkar rehte the isay ‘Shahi Mohalla’ kaha jata tha.

Aaj bhi jo log auto rickshaw ya taxi ke zariye in ilaqon tak jatay hain woh ise Shahi Mohalla hi kehte hain.

Yahan mojood bohat se ‘kothay’ Mughal daur-e-hukoomat mein qaim hue aur yeh is khittay ka sunehri daur tha.

Stage director ke tor par kaam karne wale Professor Triporari Sharma batate hain ke Mughal daur mein in ilaqon mein riyasat se taluq rakhne wale ameer log aur un ke khandan rehte the.

Unhon ne kaha ke khushi ke mauqaat par un ke programs Shahi Mohallon mein hotay the.

Woh batate hain ‘Aaj kal lafz kotha ki jis tarah tashreeh ki jati hai woh durust nahi hai. Ek waqt tha jab kotha art ka markaz tha jahan sirf gana, musiqi aur raqs hota tha.’

‘Kothon se mansalik khawateen apne aap ko fankar ya adakarah kehti thi, yahan achi tahreerein likhi jati thi aur shayari hoti thi. Kothon par bohat aala darje ka mukalma hua karta tha aur log guftagu karne ka hunar jan’ne ke liye bhi yahan aate the.’

Un ka mazeed kehna tha ke ‘Yahan bohat aala satah ke mukalme hotay the aur log yahan aa kar seekhte the ke mashray mein baat cheet aur istidlal kaise kiya jaye.’

Agarche 16wi sadi ke akhir tak Lahore Mughliya saltanat ka markaz nahi raha tha lekin riyasat ka asar-o-rasookh barqarar raha.

Shahi Mohalle Mein Jism Faroshi Ki Ibtida

 

Karan Johar ki film ‘Kalank’ mein ‘Hasanabad’ naam ka ek shehar dikhaya gaya hai aur bazaahir aisa lagta hai ke is ki tehreek Heera Mandi naam ki isi ilaqe se li gayi hai.

Mughlon ke zawal ke saath saath bar-e-sagheer mein Marhata mazboot ho rahe the jinhon ne Ahmad Shah Abdali ke hamlon ka samna tha. Abdali ne Punjab, Shumali Hind aur Rajputana par hamle kiye aur un ki foujon ne ibtida mein Dhobi Mandi aur Heera Mandi ke qareeb Mohalla Dara Shikoh ke ilaqe mein apne markaz qaim kar liye.

Yahan basne wali tawaifon ka rabta kai shahi khandanon ke afrad se bhi rehta tha.

Abdali ke hamle ke baad paida hone wali surat-e-haal ke baais ghurbat barhi aur is ilaqe mein paison ke aawaz jism faroshi ka karobar barhne laga aur yahan kothay par rehne wali khawateen jism faroshi ke peshe ka intikhab karne par majboor ho gayin.

Is surat-e-haal ko dekhte hue ghurbat se nibrad azma khawateen is peshe mein rozgar ke liye shamil hone lagi hain.

Is dor mein Mughal governor Abdali ke hamlon ko rokne ki koshishain kar rahe the aur mukhtalif groups aur afwaj mein tasadum ke baais paida hone wali afratafri ki wajah se yeh ilaqa bhi mutasir hua.

Is pur-ashoob dor ke baad sanah 1799 mein Lahore par Maharaja Ranjit Singh ki hukoomat qaim hui. Ranjit Singh ke dor mein yeh ilaqa aur is ke gird-o-nawh mukhtalif wajuhat ki bina par zyada pareshani mein nahi pade. Isi dor mein Maharaja Ranjit Singh ke Diwan Heera Singh ke naam par Shahi Mohalle ka naam Heera Mandi pada.

Maharaja Ranjit Singh ke dor mein Lahore ek bar phir ek bade markaz ke tor par ubhra aur is ki shahi ronaq laut ayi aur yeh silsila us waqt tak jari raha jab March 1849 mein East India Company ne Lahore par qabza kar liya.

British Dor Aur Heera Mandi

Professor Sharma ke mutabiq jab angrez iqtadar mein aaye to unhon ne aisi tamam cheezon ko band karna shuru kar diya jo baghawat ka charah ban sakti thi aur tawaifon ke liye license ko laazmi qarar diya gaya.

Un ka kehna hai ke jab kothon ke liye license wala silsila shuru hua to police ne qanoon par amaldrآmad ke liye in jaghon par chhape mar’na shuru kar diye.

Un ka kehna tha ke ‘British dor-e-hukoomat mein police tafteesh ke bahane kisi bhi waqt chhapa marne ke liye yahan pahunch jati thi.’

‘Yeh mamool ban gaya. Is surat-e-haal ko dekhte hue bohat se logon ne yahan aana jana chhod diya aur is jagah ka tasur aahista aahista badalne laga.’

Filmon Mein Heera Mandi

Heera Mandi: Lahore ke Shahi Mohalle ko yeh naam kaise mila?Dada Saheb Phalke ne pehli Hindustani film 1913 mein banayi. Ibtidayi salon mein, khawatein filmon mein adakari nahi karti thin aur mard hi khawatein ka roop dhar kar filmon mein khawatein ka kirdar karte the.

Ghair munqasim Hindustan aur Pakistani film industry mein filmon mein kaam karne wale kai adakaron ki jaden Heera Mandi mein hain.

India aur Pakistan ki taqseem ke baad yahan se taluq rakhne wale bohat se afrad India aaye aur yahan filmi sannat aur doosre peshaon se mansalik ho kar apni zindagi guzarne lage.

Pakistan mein muqeem musannifa Fozia Saeed ne bhi apni kitab mein Heera Mandi ke bare mein likha hai.

Unhon ne apni kitab ‘Taboo: The Hidden Culture of a Red Light Area‘ likhne ke liye 8 saal tak Heera Mandi par tehqiq ki.

Woh yahan rehne wali khawatein aur community ke doosre logon ki zindagi ke bohat se pehluon ko samne layin.