Koffee with Karan ka aathwan season Jumeraat ko Deepika Padukone aur Ranveer Singh ki jori ke sath shuru hua jis mein dono adakaron ne apni 11 saal ki mohabbat aur shadi se judi bohot si an suni kahaniyan sunayin.
Deepika aur Ranveer pehli bar ek sath is show ka hissa bane. Rang birange kapron mein nazar ane wale Ranveer Singh ko Deepika ke sath siyah libas mein dekha gaya.
Bollywood ke kai sitaron ki tarah in ki mohabbat ki kahani bhi ek film ke doran hi shuru hui, jo Sanjay Leela Bhansali ki film ‘Ram Leela’ se thi.
Ye 2012 ki baat hai. Tab Kareena Kapoor ye film karne wali thi. Ranveer ne bataya ke shooting se ek hafta pehle Kareena Kapoor ne kuch wajuhat ki bina par film chhod di.
Unhon ne kaha ke ‘Phir hum sab soch rahe the ke is kirdar ke liye kis ko cast kiya jaye. Film Cocktail samne aayi jise dekhne ke baad mein Deepika ke haq mein tha. Phir Deepika ko wo kirdar mil gaya.’
Ranveer ne bataya ke ‘Jab hum film ka script parhne Bhansali ke ghar gaye to Deepika wahan safed kapron mein pohnchi. Wo hawa ke jhonke ki tarah meri zindagi mein aayin.’
Ranveer ne bataya ke us ke baad sab ne ek sath raat ka khana khaya. Ranveer ne Deepika ko un ke daanton mein koi cheez phanse hone ka bataya. ‘Wo mere paas bethi hui thi, mein ne un ke daant ki taraf ishara kiya aur unhon ne kaha ke aap khud ise hata dein. Mein ne ise apne haathon se hataya lekin mujhe us waqt jo bijli ka jhatka laga wo abhi tak mojood hai.’
Ye dono ke darmiyan ek khoobsurat dosti ka aghaz tha. Film ki shooting ke doran dono ne ek sath kaafi waqt guzara aur in mein qurbatein barhi jo mohabbat mein badal gayin.
Aksar filmi mohabbatein film ki shooting khatam hote hi khatam ho jati hain. Deepika Padukone ne bhi bataya ke wo is rishte ko le kar sanjeeda nahi thi.
Deepika ne bataya ke wo us waqt single thi aur Ranveer bhi ek rishte se bahar aachuke the. ‘Phir Ranveer meri zindagi mein aaye lekin shuru mein un ke liye koi commitment nahi thi. Us waqt hum technically kisi aur ke sath date par ja sakte the lekin hum hamesha ek dosre ke paas wapas aajate the.’
Deepika ne bataya ke wo us waqt kuch logon se mili thi lekin: ‘Na to mujhe un mein dilchaspi thi aur na hi mein un ke liye purjosh thi. Darhaqiqat mein zehni tor par Ranveer ko chahti thi.’
Phir Ranveer ne bataya ke unhone 2015 mein Deepika ko shadi ki peshkash ki jis ke baad dono ne khamoshi se mangni kar li aur ise teen saal tak sab se chhupaya.
Ranveer ne bataya ke unhon ne Deepika ko Maldives ke sahil par propose kiya jise Deepika ne qubool kar liya. Tab tak Ranveer Deepika ke khandan se nahi mile the.
Bad mein Ranveer Deepika ki family se milne Bangalore gaye. Jab pura khandan ikhatta hua to Deepika ne khane ki mez par Ranveer ke proposal ke bare mein bataya. Deepika ke ghar wale dang reh gaye.
Ranveer ko maloom hua ke Deepika ki walida mangni par narazi zahir kar rahi thi kyun ke unhe is bare mein pehle nahi bataya gaya tha. Kamre mein khamoshi chha gayi magar baad mein sab ne unhain mubarakbad di.
Deepika aur un ki walida Ujala ke darmiyan behas bhi hui jise Ranveer ne darwaze ke bahar se suna. Ranveer ne bataya ke Ujala ne Deepika se poocha ‘Ye shakhs kon hai? Is ne shadi ki peshkash ki aur aap ne haan kar di?’
Ek Sindhi khandan se taluq rakne wale Ranveer Singh ko Deepika Padukone ke khandan ke sath jurne mein kuch waqt laga. Aakhir kar 14 November 2018 ko dono ne shadi kar li. Ranveer ka khayal hai ke unhe mangni se pehle Deepika ke ghar walon se milna chahiye tha.
Show mein apne rishte ki tafseelat batane ke baad Deepika aur Ranveer ki shadi ke kuch sunehri lamhaat nazerin ke sath share kiye gaye. Is mein Ranveer ke bare mein Prakash Padukone ki raaye, Ranveer Singh ke walid ka tabsara, Deepika ki shadi par raaye aur shadi ke khoobsurat lamhaat ko dikhaya gaya.
Deepika ke walid Prakash Padukone ne kaha ke un ka khandan bohot boring hai aur Ranveer un ki zindagi mein achi tabdeeliyan laye hain.
Wo kehte hain ke Ranveer ne ‘apni jaan qurban kar di hai.’
Deepika Padukone ka kehna tha ke ‘Mein Ranveer ko ek aise shakhs ke tor par pasand karti hoon jise duniya nahi janti. Wo pursukoon, zehin aur hassas hain. Ranveer rota bhi hai aur shadi ne unhe mukammal kiya hai.’
Ranveer ka munfarid libas aur adakari unhe nojawanon mein maqbool banate hain magar baaz log is par social media par tanza bhi karte hain.
Is bare mein Ranveer ne wazeh kiya ke wo sab ki raaye ka ihtiram karte hain lekin apne dil ke mutabiq kaam karte hain.
2014 mein Deepika Padukone ne apne depression ka zikar kiya aur duniya ko bataya ke wo zehni bimari ka shikar hain aur is se larnay ke liye maahirin nafsiyat ki madad le rahi hain. Deepika is mauzo par baat karna zaroori samajhti hain kyun ke aksar log yeh nahi samajhte ke wo depression ka shikar hain.
Deepika ne bataya ke ‘Mein taqreeban aath se nau mah se depression ke sath tanha jadojahad kar rahi thi. Ek bar Ranveer ke sath nashta karte hue mein achanak rone lagi.’ Ranveer ne Deepika ki family ko Mumbai bulaya. Is ke baad wo bilkul theek rahi lekin jaise hi ghar wale wapas jane wale the, Deepika ke tasurat badalne lage jis par un ki walida samajh gayin.
Wo unhen ek doctor ke paas le gaye. Deepika taqreeban 10 saal se is bare mein khul kar baat karti aayi hain aur depression se larnay ke liye adwiyat bhi le rahi hain.
Wo chahti hain ke zehni sehat par baat ki jani chahiye aur marizon ko madad milni chahiye.
Deepika ne bataya ke guzishta barson mein Ranveer ne nafsiyati marizon aur un se numtane ke tareeqe ko samjha hai. Deepika ne Ranveer ki tareef karte hue kaha ke jeevan sathi ke tor par unhon ne aisa mahool banaya hai jis mein wo khud ko mehfooz mehsoos karti hain.
Ek sanjeeda behas ke baad show ka mahool besakhta rapid fire ki taraf chala gaya.
Ranveer Singh jald Farhan Akhtar ki film Don 3 mein nazar aayenge aur wo chahte hain ke log unhen is kirdar mein qubool karein. Jab Ranveer se poocha gaya ke wo kis mard adakar ke sath mohabbat ka kirdar nibha sakte hain to unhon ne jawab mein Ranbir Kapoor ka naam liya jo Deepika ke sabiqa boyfriend hain.
Ranveer ne Karan Johar se poocha ke ‘Kya aap hum teenon ke sath Sangam banane ja rahe hain.’ Is par Karan Johar ne kaha ‘Mein banaunga. Mein ab bhi Sangam bana sakta hoon.’
Raj Kapoor ki ‘Sangam’ ek mohabbat ke takoon par mabni film thi. Is doran jab Ranveer se poocha gaya ke unhain Deepika ki on screen jori kis ke sath sab se zyada pasand hai to unhon ne Shah Rukh Khan ka naam liya.
Deepika ne is sawal par Shah Rukh Khan ke sath Ranbir Kapoor, Irrfan Khan aur Hrithik Roshan ka naam liya.